سزای ئێعدام بۆ هادی عەباسیان، یەکێک لە ناڕازییەکان لە شیروان
سزای ئێعدام بۆ هادی عەباسیان، یەکێک لە ناڕازییەکان لە شیروان
هادی عەباسیان، هاووڵاتییەکی ٣٨ ساڵە و دانیشتووی شیروانە، لەلایەن دادگای ئینقلابی بۆجنوردەوە بە سزای ئێعدام مەحکوم کراوە.
ئەم حوکمە ڕۆژی یەکشەممە، ١٣ی مانگی مەهر، لە زیندانی شیروان بە هادی عەباسیان ڕاگەیەنراوە. عەباسیان لە ٢٣ی مانگی ڕەمەزان لە ناوچەی فەرهەنگ‌شەهری شیروان دەستگیر کرابوو. بەپێی زانیارییە بەدەستهاتووەکان، ئەو لە ماوەی خۆپیشاندانەکاندا بە بڵاوکردنەوەی ڤیدیۆ، لە خەڵکی داوە لە کۆبوونەوە و خۆپیشاندانەکاندا بەشدار بن.
ئەم ناڕازییە لە یەکەم ڕۆژی دەستگیرکردنیدا تووشی ئەشکەنجە بووە و دوای ئەوەی دۆخی جەستەیی خراپ بووە، بۆ نەخۆشخانە و دواتر بۆ زیندانی شیروان گواسترایەوە.
لە ماوەی دەستگیرکردنەکەیەوە تاکوو ئێستا، دەسەڵاتدارانی دادوەری و ئاسایشی ڕێگرییان لە بینینی خێزانەکەی لەگەڵ ئەو کردووە. هەروەها عەباسیان لە هەموو قۆناغەکانی دادگاییدا لە دەستگەیشتن بە پارێزەری هەڵبژێردراوی خۆی بێبەش کراوە.
تاکوو ئێستا، وردەکاریی تۆمەتەکان و بەڵگە و بەڵگەنامەکانی دادگا کە بوونەتە هۆی دەرکردنی ئەم حوکمە، لەلایەن سەرچاوە فەرمییەکانەوە بە ڕوونی ڕانەگەیەنرا.
Comments